RantauNet di Wordpress

Kumpulan diskusi Pilihan Mailing List RantauNet

1. marola 2.18.10 / 3pm

   Mak Sati
   Sekitar maso itu ado kawan bapak ambo. Urang Galuang nan bakadai kupiah beka di pasa ateh. Lupo pulo ambo merek kupiahnyo Lai kenal mak Sarti ?

   Kalau H. Amirsyam jo H.Marlian nan rumahnyo dimuko rumah Lili Syarief dakek Simpang Tigo arah ka Musajik Galuang. Itu adolah mintuo ambo

   Nan lain panggaleh karateh alm. Bahar St Bandaro nan tingga di Jl Pontianak -Ulak Karang

   Mungkin mak Sati ado nan kenal jo urang Galuang itu …

   Wass
   TR

   Reply
2. marola 2.18.10 / 4pm

   Waalaikumsalam w.w. Mak Sati,

   Sato ambo salincam mangomentari curito Mak Sati tantang ampek hal:

   1) “Tgl. 4 Mei 1958, APRI masuk kota Bukiktinggi pagi2 malenggang kangkuang. Dari kampuang ambo, Galuang, ambo maliek bana tantara APRI ko bajalan kaki melewati Padang Lua, diiriangi oto dan truk, tanpa letusan senjato ciek juo .”

   Pers asiang juo mancaliak kaadaan nan Mak Sati saksikan tu, dan jo agak taheran-heran — mungkin juo satangah mancemeeh — manyabuiknyo sabagai “the most civil civil war’ nan bisa diterjemahkan sabagai ‘perang saudara nan sangat santun’. [Habis, ndak ado tembakan samo sakali !].

   2) “Ironisnyo, kutiko ambo bajalan kaki di Birugo, ambo maliek babarapo urang tantara nan mamakai seragam APRI, ambo kenali di Sungai Pua sebagai tantara PRRI. Ruponyo mereka lansuang manyubarang baitu APRI masuak Bukiktinggi.”

   Pasukan organik KDMST memang tampak indak basumangaik bana baparang salamo PRRI, sahinggo nan manjadi andalan adolah TP nan tadiri dari anak-anak mudo, mahasiswa dan pelajar, nan alun lamo dilatiah militer.

   3) Kutiko penyerangan PRRI ka kota Bukittinggi bulan Juni 58 (tanggalnyo lupo ambo) ambo mangalami bana, mulai sasudah magrib bunyi badia badaram-daram sampai jam 7 pagi bisuaknyo. Sakiro jam 8 ndak ado lai letusan, dan tadanga kaba, puluahan mayik tantara PRRI babujuakan di jalan dakek Jam Gadang. Ambo cigok ka sinan, batua. Ado urang nan mancubo mamareso saku mayik tu, dan basuo a.l. kartu anggota tantara.

   Sampai sanjo sambuah oto bulak baliak mambao mayik lain ka Rumah Sakik (Ahmad Mukhtar kini). Bisuaknyo sato lo ambo pai ka RS mancaliak mayik ko, nan indak taetong banyaknyo. Kabanyo, sebahagian gadang adolah urang manggaleh nan kalua subuah pai ka kamar mandi umum di pasa ateh tu dan di tampek2 lain, lansuang didor dek APRI dek disangko tantara PRRI. Hari tu, seluruh korban dimakamkan sacaro masal di Ateh Ngarai, di balakang RS, lai ciek mayik ciek kuburan. Nan ado identitas, apolai kok ado keluarganyo, buliah dibao pulang.

   Angko jumlah korban nan dapek ambo kumpuakan wakatu manyiapkan disertasi ambo tantang peristiwa ko adolah sekitar 250 urang, suatu angko nan bukan main gadang untuak daerah dan bapanduduak saketek saroman Sumbar. Rasonyo alun ado kajian mendalam tantang peristiwa Juni 1958 ko, antaro lain tantang:
   1) apo tujuan politik dan tujuan militer nan ingin dicapai dari serangan tu [mengulang Serangan Umum 1 Maret 1949 di Yogya?] ;
   2) baa rencana dan apo perintah operasinyo;
   3) sia komandan PRRI nan mangaluakan parintah serangan ka Bukiktinggi bulan Juni 1958 tu;
   4) lai tacapai atau indak tujuan politik dan tujuan militer tu, atau malah marugikan kasaluruhan ‘perjuangan’ PRRI ?

   Sacaro pribadi, ambo sabana sadiah mandanga dan mambaco kisah peristiwa Bukktinggi tu, karano nan jadi korban adolah anak-anak mudo nan kiro-kiro saumua ambo wakatu itu [ antaro 18-22 tahun].

   4) Batalyon B adolah kesatuan nan paliang sadis. Urang nan tingga di sekitar batalyon ko, tiok malam mandanga luluangan urang nan disiksa. Nan paliang babahayo adolah informan, urang sipil nan ditunjuak dek APRI jadi mato2, nan kutiko tu tamusaua dgn istilah “12 koma tunjuak”. Asa kanai tunjuak dek informan ko, lansuang masuak tahanan Batalyon B, salasai tu mah. Hampia ndak ado nan babaliak pulang kabanyo.

   Saparati ambo sampaikan sabalun ko, Batalyon B ko adolah eks anggota CTN dari Pasaman, dan mulonyo iyo agak marasai dek PRRI, sahinggo mereka kudian mambaleh kasam ka PRRI.

   Marilah kito ranuangkan bana-bana pangalaman paik salamo ba-PRRI ko. Tapi indak usah baibo-ibo, karano ‘kaki talongsong inai padahannyo’.

   Wassalam,
   Saafroedin Bahar

   Reply
   1. marola 2.18.10 / 5pm

      Pak Saaf yth.

      Kutiko kota Batusangka baru sajo diduduki tantara Pusek, mungkin Juni 1958 kampuang ambo, Tanjuang, dijago oleh kompi Baringin Sati, nan anggotanya indak sorang juo tantara profesional (APRI). Bahkan komandan kompinyo kabanyo bekas pegawai perusahaan listrik, Muhir Aloha, urang Aceh, dan wakianyo Malin Maradjo, pandeka silek Kumango.

      Samo suasananyo nan dicaritokan Mak Sati, indak ado perlawanan kutiko tantara Pusek pertamo masuak kota.

      Suatu sore di Tanjuang, malinteh tantara reguler di pihak lua, kalau indak salah kompi D namonyo. Tantara tersebut mambao macam macam senjato berat maupun senjato ringan nan indak dipunyoi dek kompi Baringin Sati.

      Tibo tibo terjadilah letusan, tembakan nan luar biaso gaduahnyo, sarato teriakan teriakan. Ambo mangiro alah tajadi pertempuran antaro tantara Pusek jo kompi Baringin Sati.
      Kiro kiro sejam tembakan indak putuih putuihnyo.

      Ruponyo nan saling malatuihkan badia itu iolah kaduo pasukan tersebut. Baringin Sati nak minta bagi sanjato, tapi kompi D iko kabanyo nak bagabuang ka tantara Pusek.
      Nan tadanga hariakan komandannyon namonyo Boyok, maju Boyok …dst.

      Seluruh anggota Baringin Sati itu anggotanya pelajar jo pemuda kota Batusangka

      Sasudah kejadiaan itulah, hampia satiok bulan kota Batusangka digaduah pada malam hari dengan serangan gerilya, sehinggo kota dipaga jo aliran listrik.
      Setiap kali serangan ka Batusangka, kabanyo tantara Pusek batahan di benteng Fort van der capellen, lalu kudian baru datang bantuan dari Simabua.

      Salam
      Abraham Ilyas

      Reply
      1. marola 2.19.10 / 1am

         Tarimo kasih ateh tambahan info ko, pak Abraham, Baru kali iko ambo mandanga bahaso antaro sasamo pasukan PRRI panah juo tajadi saling tembak, antaro pasukan regulernyo jo pasukan non-reguler, mamparabuikkan sanjato.Kok soal sanjato kan memang PRRI sabana langkok, karano baru dibantu dek Amerika Serikat. [PRRI wakatu tu kan alah punyo recoilless rifles, bazooka, jo badia M-1 Garrand, nan indak ado dipunyoi dek TNI].

         Nampak sakali bahaso pamberontakan PRRI tu samo sakali indak ado landasan ideologinyo. Balain bana jo PDRI (Pemerintahan Darurat Republik Indonesia) nan juo balokasi di Sumatera Barat sambilan tahun sabalunnyo, nan didorong dek semangat cinta tanah air malawan Ulando.

         Jiko kito pikia-pikia, walaupun [sabagian] tujuan akhir dari PRRI iko adalah untuak ‘mahariak’ pemerintah pusat nan indak mamparatikan aspirasi jo kepentingan daerah, namun pilihan mambarontak mungkin paralu bana-bana kito padebatkan, antaro lain karano sacaro militer memang PRRI samo sakali indak siap, walaupun sumangek sabana tabudua. [Iko nan ambo namokan sabagai 'strategic blunder', kakaliruan strategi.] Mambarontak kan indak bisa disamokan jo sakadar mahariak dan manggaregak sajo. Ambo raso itu alasannyo mako pak Hatta malarang Ahmad Husein supayo jan mambarontak.

         Tantu sajo kito haruih tatap manaruah hormat kapado saluruah korban nan jatuah dalam ‘parang’ PRRI iko, sasuai jo tradisi militer dima juo. Namun kajian strategis sacaro komprehensif taradok PRRI paralu dilakukan, sacaro sangat kritis dan profesional, bukan sajo karano korban jiwa di kalangan urang awak bukan main gadang, tapi juo karano sacaro kajiwaan dan politik Minangkabau sabana mundur sasudah tu, antaro lain jo hilangnyo harago diri, sampai-sampai indak amuah lai mangaku urang Minang dan maagiah namo-namo Jawa untuak anak-anak nan lahia sasudah tahun 1958.

         Untuang ado pak Harun Zain — urang Pariaman nan manjadi TP Brigade XVII di Jawa Timur — nan bagak maambiak prakarsa untuak mangumumkan ‘strategi harago diri’ dalam tahun 1968,dalam suasana Orde Baru dan sasudah dihancuakannyo PKI, sapuluah tahun sasudah PRRI itu. Baru sasudah tahun 1968 tu mulai urang awak mulai bisa agak pulih harago dirinyo, sampai pado tahun 1984 mandapek panji ‘Parasamya Purna Karya Nugraha’ dari Pemerintah Pusat.

         Tapi, rasonyo sampai kini urang awak alun bisa maambiak ‘leading position’ nan panah dipaciknyo dalam kahidupan politik — dan mungkin juo dalam kahidupan ekonomi — Indonesia. Kalau memang iyo baitu, ambo raso kini lah saatnyo bagi urang awak untuak bana-bana manata diri, dalam suasana Reformasi nan alah maagiah otonomi daerah nan sabana luas kapado daerah-daerah.

         Salah satu hambatannyo, manuruik pandangan ambo, adolah faktor sosial budaya, khususnyo karano sistem nilai Minangkabau kito memang dirancang untuak hiduik surang-surang, sanagari sanagari, indak amuah basatu dan indak ado struktur supra nagari nan bisa mampasatukan. Hal itu nan baru-baru ko disampaikan dek Sanak Zulkarnain Kahar, atau dek pak Capt Darul Makmur sabalun ko.

         Ikolah nan sadang diusahokan untuak ditangani dek Gebu Minang kini, jo mamprakarsai Kongres Kebudayaan Minangkabau 2010, dima diusahokan adonyo kasapakatan kito urang Minang untuak bana-bana manyatukan urang awak mambangun maso datang, malalui parumusan ABS SBK, baiak sistem nilai maupun limbago tapadu untuak manindaklanjutinyo, badasar Pancasila, UUD 1945, dan dalam konteks NKRI.
         Tolong jo doa, pak Abraham.

         Talabiah takurang mohon maaf.

         Wassalam,
         Saafroedin Bahar

Blog at WordPress.com. | Theme: Hemingway by warpspire.

Entries RSS Comments RSS